"Манчестер Юнайтед"дан ижарага олинган "Астон Вилла" форварди Маркус Рэшфорд Бирмингем клубидаги ўйинлари Европанинг етакчи клублари эътиборини тортишига умид қилмоқда, деб хабар беради talksport.
Жорий йилнинг қишида "Астон Вилла" Рэшфордни 40 миллион фунт эвазига сотиб олиш ҳуқуқи билан мавсум охиригача ижарага олди.
Англиялик форвард янги клуби сафида барча мусобақаларда 15 та ўйин ўтказиб, 3 та гол урган ва 5 та голга ҳаммуаллифлик қилган.
"Манчестер Юнайтед"га яқин манбаларнинг таъкидлашича, Рубен Аморим мураббийлик қилаётган пайтда футболчининг клубга қайтиш истиқболи катта эмас.
27 ёшли англиялик футболчининг ўзи "Барселона"га ўтишни маъқул кўрмоқда.
Рэшфорднинг "Астон Вилла"да қолиши эҳтимоли ҳақида манбанинг таъкидлашича, футболчи клубда маош сўровларини қисқартиришига тўғри келади. Ҳозирда футболчи ҳафтасига 350 минг фунт атрофида маош олмоқда.
