Аргентиналик афсонавий ҳужумчи Лионель Месси “Реал” ҳужумчиси Килиан Мбаппе ҳақида гапирди. Унинг таъкидлашича, француз аллақачон икки марта жаҳон чемпиони бўлиши мумкин эди. Бироқ ЖЧ-2022 финалида Килианнинг голлари Францияни Аргентинага мағлубиятдан қутқариб қола олмади.
Месси жаҳон чемпионатидаги мағлубиятлардан ҳали ҳам афсусда эканини тан олди.
"Мбаппе 2018-йилда жаҳон чемпионатида ғолиб чиқди. 2022-йилда у финалда тўрт марта бизга қарши гол урди [жумладан, пенальтилар билан], лекин чемпион бўлмади. Бу ақлдан озганлик. 2014-йилда ҳам шунга ўхшаш нарсани ҳис қилдим – бу қийноқ эди. Ҳалигача орқамга қарайман ва ўйлайман: Икки карра жаҳон чемпиони бўлишим мумкин эди", дейди Месси.
