"Ливерпуль" дарвозабони Алиссон Беккер клуб билан шартномасини узайтириб, "Энфилд"да қолишга тайёр, дея хабар бермоқда TEAMtalk нашри.
Бразилиялик дарвозабон 2018 йилда "Рома"дан 56 миллион фунт эвазига "қизиллар" сафига келиб қўшилган ва футбол тарихида Кепа Аррисабалагадан кейин иккинчи энг қиммат дарвозабонга айланганди. Ўшандан бери у "Ливерпуль"га саккизта совринни қўлга киритишга ёрдам берди - ва сўнгги, ўта ҳиссиётли АПЛ чемпионлиги бу муваффақиятли даврнинг ҳақиқий тожига айланди.
Алиссоннинг клуб билан амалдаги шартномаси 2027 йилнинг ёзигача мўлжалланган. Аввалроқ, "Ливерпуль" футболчининг нархи юқори бўлиб турганда максимал фойда кўриш учун уни шу ёздаёқ сотиб юбориши мумкинлиги ҳақида миш-мишлар тарқалган эди. Айниқса, Алиссоннинг ўзи карьерасидаги янги чақирувга очиқ деган тахминлар фонида.
Бу миш-мишлар Мамардашвилининг ўтган йилги трансферини ҳам қўллаб-қувватлади - дарвозабон "Валенсия"дан 29,5 миллион фунт эвазига ўтди, аммо у испан клубида яна бир мавсум ижара асосида қолди. Аммо чемпионликни нишонлаганидан кейин Алиссон режаларини ўзгартирган ва энди "Энфилд"да қолмоқчи.
Қўшимча қилиш жоиз, бразилиялик футболчи жорий мавсум "Ливерпуль" сафида барча мусобақаларда 31 та ўйинда майдонга тушиб, 24 та гол ўтказиб юборган ва 13 марта ўз дарвозасини дахлсиз сақлаб қолган.
