"Барселона" Чемпионлар лигаси доирасида "Интер"га қарши ўйинда жароҳат олган ва танаффусга бироз вақт қолганда алмаштирилган ҳимоячи Жюл Кундени йўқотди.
Каталония клуби Кунденинг текширув натижаларини маълум қилди, бироқ футболчининг тикланиш даври ҳақида ҳеч қандай маълумот бермади.
AS нашрига кўра, Кунденинг тикланиши учун уч ҳафта керак бўлади. Демак, француз бир қанча ўйинларни, жумладан, "Интер"га қарши ярим финал жавоб ўйинини (6 май) ва Ла Лигадаги "Эл-Класико"ни (11 май) ўтказиб юборади.
2024/2025 йилги мавсумда Жюл Кунде 53 та расмий ўйин ўтказиб, 4 та гол урди ва жамоадошларига 8 та голли узатмани амалга оширди.
