Бугун бўлиб ўтган матбуот анжуманида Карлос Кейруш Жанубий Корея терма жамоасига яхши тилаклар билдирди ва мезбонлар билан биргаликда Эрон терма жамоасининг ЖЧга чиқишига умид билдирди.

Унинг бундай сўзларини маҳаллий ОАВ вакиллари илиқ кутиб олди. Ўз навбатида Кейруш матбуот анжуманига кеч қолгани учун узр сўради. Бунинг сабабини Сеул кўчаларида тирбандлик билан изоҳлади.

"Агар жаноб Чой ҳозир шу ерда бўлганида дарҳол жангни бошларди. Бўлиб ўтган сўз ўйинлари учун мен узр сўрамоқчиман. Корея терма жамоасида амалда Жаҳон чемпионати йўлланмасини ҳал қилиб бўлди. Бу билан кореяликларни табрикламоқчиман", дейди Кейруш.

"Эртага мухлислар қизиқарли ўйин гувоҳига айланишади. Ўйиндан кейин Корея терма жамоаси байрам уюштиради. Биз ҳам уларга қўшилишни истаймиз. Биз Жанубий Корея терма жамоасини жуда ҳурмат киламиз. Биз бу ерга ўз олдимизга қўйилган вазифани бажариш учун ташриф буюрдик ва эртанги ўйинда буни уддалашимизга ишонамиз", дейди португалиялик мутахассис.

Матбуот анжуманида Кейрушга Эрон терма жамоаси сардори Жавод Некунамнинг айтган гаплари ҳақида ҳам савол берилди.

"Мен 33 йиллик мураббийлик фаолиятим давомида жуда кўп давлатларда ишлаганман. Мен Япония, АҚШ, Испания, Жанубий Африка ва Англияда ишладик. Лекин бирор жойда сўнгги ҳафтада бўлиб ўтган ахборот жангини кўрмаганман. Бундай ишларга ҳозироқ нуқта қўйишимиз керак".

Карлос Кейруш корейс халқининг маданияти ва хулқидан ҳайратга тушганини таъкидлади.

"Корея фубол ассоциацияси ажойиб кишилардан ташкил топган ва кореяликлар футболчилар ҳам яхши инсонлар ҳисобланади. Кореяликлар энг меҳрибон ва меҳмондўст халқ эканини бутун дунё билади. Бир ёки икки кишининг тилига эрк бериши туфайли Корея халқини ёмон кўриб қолиб бўлмайди", дейди бош мураббий.

"Ҳар иккала терма жамоа мухлислари учун биз яхши ўйин кўрсатишимиз керак. Шунингдек, ФИФА қоидаларида таъкидланганидек, биз ҳалол футбол ўйнашимиз лозим. Эрон халқи анъаналарига кўра, биз эртага ўйиндан олдин кореялик футболчиларга гул тақдим қиламиз. Биз қасос ёки қон ҳақида эмас, футбол ҳақида ўйлаймиз. Бу жавоб беришнинг замонавий ва маданий кўринишидир. Менинг сўнгги сўзим оддий: биз бу ерга ЖЧга чиққанимизни нишонлаш учун келдик, Корея билан жанг қилиш учун эмас. Бу ерга Корея ва Эрон журналистлари футболдан завқ олиш учун йиғилишди", дейди Кейруш.

Журналистлардан бири Кейрушнинг Ўзбекистон терма жамоаси футболкасини сотиб олиб, Чойга совға қилмоқчи бўлгани ҳақида фикрини эслатди.

"Озгина ҳазил қилишга рухсат беринг. Мен Чой учун Ўзбекистоннинг футболкасини сотиб олишга тайёр эдим. Лекин у 11та футболка талаб қилганидан кейин мен ўз фикримни ўзгартирдим. Менда 11та футболка сотиб олиш учун пул йўқ. Ўйиндан кейин Чойнинг қўлини сиқиб қўяман. Ўйиндан кейин терма жамоаларимизнинг ЖЧга чиққанини биргаликда нишонлаймиз", дея сўзини якунлади Карлос.