Бугун соат 18:00да Ўзбекистон миллий терма жамоаси "Бунёдкор" стадионида ўйинолди расмий машғулотини ўтказди. Қоидага мувофиқ, машғулотнинг дастлабки 15 дақиқаси журналистлар учун очиқ бўлиши керак эди. Аммо қалам аҳли вакилларини 15 дақиқадан кейин ҳам ҳеч ким стадионни тарк этишни сўрамади. Боз устига, уларнинг ўзлари ҳам машғулот жараёнини охиригача кузатишди. Ваҳоланки, журналистларнинг ўзлари ҳам бундан аввалги мана шундай расмий машғулотни 15 дақиқа кузатишганидан кейин стадионни тарк этиб кетишарди.

Машғулотлар 3 гуруҳга бўлинган ҳолда олиб борилди. Терма жамоа катта мураббийи Шуҳрат Мақсудов футболчиларнинг кайфиятини кўтаришга ва уларни шиддат билан ишлашга ундан турди. Унинг ўзи ҳам футболчилар билан баб-баравар машқларни бажарди.

Футболчиларда кайфият ёмон эмас. Уларда эртанги ўйинга бўлган ишонч юқори. Машғулотнинг дастлабки ярим соатида бажарилган "квадрат" ва бошқа кичик машқлардан кейин жамоа иккига бўлиниб, майдоннинг ярмида футбол ўйнашди.

"Қизиллар"да Одил Аҳмедов марказий ҳимояда ўйнади, унга Исмоилов шериклик қилди. Ўнг қанотда эса Ислом Иномов, чапда эса Виталий Денисов ҳаракат қилди. Сервер Жепаров ва Азиз Ҳайдаров майдон марказида ўйнаган бўлсалар, қанотларда Жасур Ҳасанов ва Олег Зотеев тўп суришди. Ҳужумда эса Фарҳод Тожиев ва Улуғбек Бақоев тандемда ўйнашди. Дарвозани эса Игнатий Нестеров қўриқлади. Албатта, бугунги "қизиллар" эртага асосий таркибни ҳосил қилишади, дегани эмас.

Ҳар бир 10 дақиқадан 2та тайм давом этган ўйиндан кейин футболчилар узоқ масофадан дарвозага зарбалар йўллаш, стандарт вазиятлардан фойдаланиш устида машқ олиб боришди.

Терма жамоамиз бугун машғулотни соат 18:00да бошлади (иккинчи бўлим бошланадиган пайт). Бу пайтда эса стадион узра енгил шабада эсиб турганди. Стадион ичи дим эмас. Маза қилиб футбол ўйнаса бўлади. Керакли натижани қўлга киритишимиз учун халақит берадиган нарсанинг ўзи йўқ. Ҳаммаси жойида.