Португалиялик ҳужумчи Криштиану Роналдунинг келажаги ҳозиргача номаълум бўлиб қолмоқда. Англиянинг Mirror нашри тарқатган маълумотларга кўра, футболчига турли қитъалардан бешта клуб даъвогарлик қилмоқда.

Манбанинг хабарига кўра, Роналдунинг хизматларига Португалиянинг “Спортинг”, Саудия Арабистонидан “Ал-Аҳли”, АҚШнинг “Лос-Анжелес”, Англиянинг “Челси” клуби ҳамда Туркиянинг “Бешиктош” клублари жиддий қизиқиш билдирмоқда.

Айни дамда 40 ёшли Криштиану Роналду “Ан-Насср” сафида тўп сурмоқда. Клуб Саудия Арабистони Про Лигасида тўртинчи ўринни эгаллади ва кейинги мавсум Элит Осиё Чемпионлар йўлланмасига эга чиқа олмади. Шу боис кўплаб ОАВда ҳужумчи шартномаси якунлангач, риёдликлар сафини тарк этиши борасида хабар тарқалди.

Аввалроқ ижтимоий тармоқларда Криштиану ватанига қайтмоқчи эканлиги борасида хабарлар чиққан эди. У фаолиятини бошлаган клуб — “Спортинг” сафида карьерасини тугатишни истаётгани айтилганди.

Маълумот учун, унинг “Ан-Насср” клуби билан тузган шартномаси якунланишига атиги олти ҳафта вақт қолган. У жорий мавсум Риёд клуби таркибида 39 та учрашувда майдонга тушиб, ўз ҳисобига 33 та гол ҳамда 3 та ассист ёздириб қўйган. Transfermarkt портали ҳужумчининг қийматини 12 миллион еврога баҳолаган.