Пролиганинг 6-туридан ўрин олган «Локомотив» — «Олимпик» (2:0) учрашувидан кейин меҳмонлар устози Мирко Еличич матбуот анжуманида иштирок этди.

"Ўйин яхши ўтди. Рақиб кўпроқ босим қилди, тўп назорати ҳам улар томонида бўлди. Бизга тажриба етишмади", — деб гап бошлади Еличич.

— Иккинчи ўтказилган голда дарвозабон хато қилди. Учрашув давомида у яхши ўйнаганди, бу хатога нима сабаб бўлди деб ўйлайсиз?

— Тўғриси, ўша голни кўрмадим, захирадан футболчи туширишга тайёрланаётгандим. У ёш посбон, тажриба кам, концентрация етишмади. Энг яхши дарвозабонлар ҳам хато туфайли гол ўтказишади. Футболда кўп нарсани миллисониялар ҳал қилади. Миллисонияга концентрацияни йўқотсанг хато қиласан ва гол ўтказиб юборасан.

— 6 та тур ортда қолди, «Олимпик» сиз кутган футболни намойиш этяптими?

— Йигитлар ўз вазифаларини билиб олишган. Албатта ёшлар билан ишлашда вақт керак. 4 ой кам муддат. Ёш футболчилар янада кўпроқ ишлашлари керак.