Асосий Лига 1нинг 34-туридан ўрин олган "Лион" - "Анже" (2:0) учрашувида нохуш ҳодиса юзага келди.
"Лион" ҳужумчиси Александр Ляказетт майдонда жамоасига ёрдам бераётган бир пайтда унинг уйини ўғрилар уриб кетди. Le Progrès нашри хабарига кўра, учрашув бошланганидан тахминан ярим соат ўтиб футболчининг уйига икки номаълум шахс кирган. Ўғрилар сейфга бостириб кириб, қимматбаҳо буюмлар: заргарлик буюмлари, қимматбаҳо чарм аксессуарлар ва нақд пулларни ўғирлаб кетишган. Умумий зарар 10 минг евродан ошиқроқ деб баҳоланмоқда. Полиция аллақачон тергов бошлаган. Қароқчилар Ляказеттнинг стадионда бўлганини билишганми ёки йўқми ҳозирча номаълум, аммо вақт баъзи шубҳаларни келтириб чиқармоқда.
Александр Ляказетт "Лион" тарбияланувчиси саналади. 2017 йилда у Лондоннинг "Арсенал" клубига ўтди ва у ерда беш мавсум ўтказди, шундан сўнг француз клубига қайтди.
