Тошкентда дзюдо бўйича ўтказилаётган халқаро ҳакамлик семинар машғулотларида 12 та давлат дзюдо мутахассислари иштирок этмоқда.

Халқаро семинарда АҚШ, Буюк Британия, Ҳиндистон, Япония, Қозоғистон, Қирғиз Республикаси, Тожикистон, Туркманистон, Хитой, Кувайт сингари давлат вакиллари қаторида мамлакатимиздаги турли спорт клублари, олий спорт маҳорати мактаблари, билим юртлари, марказларда дзюдо спорт тури бўйича фаолият юритаётган ўзбекистонлик мутахассислар ҳам ўз малакаларини оширмоқда.

Айтиш лозим, Ўзбекистон дзюдо федерациясининг ташаббуси асосида ўтказилаётган мазкур семинар давлатимиз раҳбари томонидан 2022 йил имзоланган “Дзюдо спорт турини янада ривожлантириш чора-тадбирлари тўғрисида”ги қарорида келтириб ўтилган дзюдо бўйича профессионал тренерлар, малакали ҳакамлар ва мутахассисларни тайёрлаш тизимини ривожлантириш, ўқув-услубий қўлланмалар ишлаб чиқиш каби вазифалар ижросини таъминлашга қаратилгани билан аҳамиятли.

Халқаро семинар машғулотларини Халқаро дзюдо федерацияси ижроия қўмитаси аъзолари, IJFнинг тегишли комиссия мутасаддилари олиб боришмоқда.

Бугун халқаро семинарнинг амалий ва назарий машғулотлари бўлиб ўтади. Эртага, 21 май куни иштирокчилар олган билимлари асосида ёзма имтиҳондан ўтишади.

22-23 май кунлари эса ҳакамлар дзюдо бўйича Тошкент шаҳрида Учқун Муродов хотирасига бағишлаб ўтказилаётган халқаро турнирда амалий имтиҳон топширишади.