Toshkentda dzyudo bo‘yicha o‘tkazilayotgan xalqaro hakamlik seminar mashg‘ulotlarida 12 ta davlat dzyudo mutaxassislari ishtirok etmoqda.

Xalqaro seminarda AQSH, Buyuk Britaniya, Hindiston, Yaponiya, Qozog‘iston, Qirg‘iz Respublikasi, Tojikiston, Turkmaniston, Xitoy, Kuvayt singari davlat vakillari qatorida mamlakatimizdagi turli sport klublari, oliy sport mahorati maktablari, bilim yurtlari, markazlarda dzyudo sport turi bo‘yicha faoliyat yuritayotgan o‘zbekistonlik mutaxassislar ham o‘z malakalarini oshirmoqda.

Aytish lozim, O‘zbekiston dzyudo federasiyasining tashabbusi asosida o‘tkazilayotgan mazkur seminar davlatimiz rahbari tomonidan 2022 yil imzolangan “Dzyudo sport turini yanada rivojlantirish chora-tadbirlari to‘g‘risida”gi qarorida keltirib o‘tilgan dzyudo bo‘yicha professional trenerlar, malakali hakamlar va mutaxassislarni tayyorlash tizimini rivojlantirish, o‘quv-uslubiy qo‘llanmalar ishlab chiqish kabi vazifalar ijrosini ta’minlashga qaratilgani bilan ahamiyatli.

Xalqaro seminar mashg‘ulotlarini Xalqaro dzyudo federasiyasi ijroiya qo‘mitasi a’zolari, IJFning tegishli komissiya mutasaddilari olib borishmoqda.

Bugun xalqaro seminarning amaliy va nazariy mashg‘ulotlari bo‘lib o‘tadi. Ertaga, 21 may kuni ishtirokchilar olgan bilimlari asosida yozma imtihondan o‘tishadi.

22-23 may kunlari esa hakamlar dzyudo bo‘yicha Toshkent shahrida Uchqun Murodov xotirasiga bag‘ishlab o‘tkazilayotgan xalqaro turnirda amaliy imtihon topshirishadi.