"Пари Сен-Жермен"нинг ўнг қанот ҳимоячиси Ашраф Ҳакимий Чемпионлар Лигаси финали олдидан Миланнинг "Интер" клуби сардори Лаутаро Мартинес билан боғланмоқчи.
Учрашув 31 май куни "Альянц Арена"да бўлиб ўтади. Ундан олдин "нерадзуррилар" яна бир муҳим ўйинни ўтказишлари керак - А Серия сўнгги турида "Комо"га қарши.
"Мен ҳали Лаутаро билан боғланмадим, лекин яқин кунларда унга хат ёзаман. Олдинда "Интер" учун жуда муҳим ўйин бор, шунинг учун кутаман. У ўз ишини клубида қилади, мен ҳам худди шу ишни "ПСЖ"да қиламан. Концентрацияни сақлаб қолишимиз керак," - деди аргентиналик ҳужумчи билан "Интер"даги фаолияти орқали таниш бўлган Ҳакимий Sky Sport нашрига берган интервьюсида.
