"Бавария"нинг ҳужумкор ярим ҳимоячиси Жамол Мусиала Миллатлар лигасининг ҳал қилувчи ўйинларини ўтказиб юборади, деб хабар беради Kicker.
Манбага кўра, Германия терма жамоаси бош мураббийи Юлиан Нагельсманн "Бавария" спорт директори Макс Эберлнинг Мусиала тикланиб, клублар ўртасидаги жаҳон чемпионатига тўлиқ тайёр бўлиши учун уни турнирга чақиртирмаслик ҳақидаги илтимосини қаноатлантирган.
Эслатиб ўтамиз, 22 ёшли германиялик футболчи 4 апрель куни Бундеслига 28-туридан ўрин олган "Аугсбург"га (3:1) қарши сафар ўйинида жароҳат олган эди. Унинг сонининг орқа юзаси шикастланганлиги аниқланди.
Жорий мавсумда Мусиала 40 та ўйинда 18 та гол урди ва 5 та голли узатмани амалга оширди.
