Италиянинг "Фиорентина" клубининг испаниялик дарвозабони Давид де Хеа "Монако"га ўтиши мумкин. Бу ҳақда инсайдер Фабрицио Романо хабар берди.

Манбага кўра, "Монако" Де Хеани ўз қисқа рўйхатига киритган ва уни қўлга киритиш учун биринчи ўринга қўймоқда. Шунингдек, итальян клуби Давидни сақлаб қолиш ва унинг шартномасини 2028 йилнинг ёзига қадар узайтириш борасида музокаралар олиб бораётгани хабар қилинган.

Де Хеа жорий мавсум “Фиорентина” сафида барча турнирлар доирасида 42 та ўйин ўтказиб, 50 та гол ўтказиб юборган ва 11 та ўйинда ўз дарвозаси дахлсизлигини сақлаб қолган. Футболчининг амалдаги клуби билан амалдаги меҳнат шартномаси 2025 йилнинг ёзига қадар амал қилади ва уни яна бир йилга узайтириш мумкин. Transfermarkt порталида берилган маълумотларга кўра, 34 ёшли футболчининг бозор қиймати 5 миллион еврони ташкил қилади.