"Интер" бош мураббийи Симоне Индзаги келаси ёзда клубини ўзгартиради. Таниқли журналист Саша Тавольерининг ижтимоий тармоқларда ёзишича, Индзаги аллақачон "Ал-Ҳилол"га ўтиш учун яшил чироқни ёққан. Саудия Арабистонида мутахассис жуда катта пул - йилига 25 миллион доллар ишлаб топади.
Қайд этилишича, Индзаги ва "Ал-Ҳилол" ўртасидаги ҳамкорликнинг кичик деталлари Чемпионлар Лигаси финалидан кейин келишиб олинади. У баҳорнинг сўнгги оқшоми - 31 май куни Мюнхенда бўлиб ўтади. Кубок учун "Интер" "ПСЖ" билан куч синашади.
Симоне Индзаги 2021 йилнинг ёзидан буён "Интер"ни бошқариб келмоқда. Бу вақт ичида "нерадзуррилар" Италия чемпионати, иккита Италия кубоги ва учта Италия Суперкубогини қўлга киритди.
