Хабарингиз бор, кеча «Насаф» жамоаси ўз майдонида Олий лига 11-тури доирасида Самарқанднинг «Динамо» жамоасини қабул қилиб, 3:2 ҳисобида ғалаба қозонди. Стадионда йиғилган мухлислар яна бир янгиликка гувоҳ бўлишди.

Кеча «Насаф» футболчилари мутлақо янги дизайнда ишланган, дунёга машҳур «Adidas» формасида майдонга тушишди. «Насаф»нинг бу йилги мавсумда янги эпикировкага эга бўлиши ҳақида гаплар бор эди ва ниҳоят уларга бу янги формалар тақдим этилди. Янги формалар уч хил рангда бўлиб, оқ, кўк ва қора ранглардан иборатдир.

Биз бу ҳақда маълумот олиш учун «Насаф» ПФК тижорат бўлими бошлиғи Заҳро Каримовага мурожаат қилдик.

«Футболчиларимиз янги формаларда кеча ўз майдонимизда илк марта майдонга тушишди. Аслида улар Ўзбекистон кубогининг 1/4 финали дастлабки учрашуви «Нефтчи»га қарши ўйинда ҳам мана шу янги формада майдонга тушишган эдилар. Формалар уч хил рангдан иборат оқ, кўк ва яна қўшимча қора ранглардан иборат. Эпикировка тўпламига футболчилар учун барча кийимлар киради, яъни қишки ва ёзги ҳамда машғулот кийимлари ҳам бор, бу йил футболчиларга янги оёқ кийимлар (бутсилар) ҳам харид қилдик. Умид қиламизки, мана шу ҳам футболчиларимизга қандайдир яхши кайфият улашади ва улар Рўзиқул Бердиев бошчилигида янги муваффақиятларни қўлга киритадилар», — дейди Заҳро Каримова.