2024/2025 йилги мавсум якунида Англия Премьер-лигасидан тушиб кетган "Ипсвич"нинг энг яхши тўпурари бўлган Лиам Делап "Челси" футболчисига айланади. Фабрицио Романо ўзининг Х аккаунтида хабар берганидек, 22 ёшли форвард билан шартнома яқин соатларда имзоланади.
Аввалроқ, "Челси" Делапнинг трансферини клублар ўртасидаги жаҳон чемпионати бошлангунга қадар якунлашни режалаштираётгани ҳақида хабар берилганди. ОАВ хабарига кўра, форвард футболчининг агентлари клубни аввалроқ огоҳлантирган "Манчестер Юнайтед"га ўтишдан бош тортган.
Эслатиб ўтамиз, Лиам Делапнинг "Ипсвич" билан шартномасида жамоа Чемпионшипга тушиб кетганидан кейин товон пули 36 миллион еврога туширилганди. Ўтган мавсумда 22 ёшли англиялик футболчи АПЛнинг 37 та учрашувида 12 та гол урди ва 2 та голли узатмани амалга оширди.
