"Ливерпуль" ҳужумчиси Дарвин Нуньес катта эҳтимол билан ёзда жамоасини ўзгартиради.
Уругвайлик уч йил муқаддам "Бенфика"дан инглиз гранди сафига кўчиб ўтган, бироқ ўзини тўлиқ намоён эта олмаган, буни кучга кирмаган бонуслар кўрсатиб турибди. Трансфер "Ливерпуль"га 85 миллион еврога тушди - ҳужумчининг муваффақиятига боғлиқ бўлган барча устамалар фаоллаштирилган тақдирда, сумма 100 миллион еврога кўтарилади, дея таъкидлайди A Bola. Қўшимча 15 млн эса умуман тўланмайдиганга ўхшайди.
Эътиборлиси, агар Нуньес яна бир бор Премьер-лига ёки Чемпионлар лигаси ўйинида асосий таркибда майдонга тушганида, "Ливерпуль" "Бенфика"га 5 млн евро кўпроқ тўлаган бўларди.
Transfermarkt талқинига кўра, 25 ёшли футболчининг айни дамдаги нархи 45 млн еврога тенг.
