"Бавария" "Байер"га ҳимоячи Жонатан Та Мюнхен клубига муддатидан олдин ўтгани учун товон пули сифатида 800 минг евро тўлайди. Бу ҳақда журналист Флориан Плеттенберг Х ижтимоий тармоғида маълум қилди.
Манбага кўра, мюнхенликларнинг клублар ўртасидаги жаҳон чемпионатидаги натижаларига қараб, "Бавария"нинг "доришунослар" учун тўловлари 1 млн еврогача ошиши мумкин. Шунингдек, Германия чемпиони Танинг июнь ойидаги маоши билан боғлиқ харажатларни ўз зиммасига олади.
Эслатиб ўтамиз, 29 ёшли ҳимоячининг "Байер" билан шартномаси 2025 йилнинг 30 июнига қадар мўлжалланган эди. "Бавария" 29 май куни Та билан меҳнат шартномасини имзолаганини эълон қилди. Мюнхен клуби иштирокидаги клублар ўртасидаги жаҳон чемпионати 15 июнь куни бошланади.
