Антуан Гризманн футболдаги ирқчилик ҳақида гапирди.
"Футбол дунёни бирлаштиради, деган ибора оддий, аммо тўғри. Ўйин бўлса, майдонда ва трибунада турли маданият ва мамлакатлардан бўлган одамлар кўп бўлади. Ҳар бир мухлис ўз мамлакати ёки ўз ватан клуби либосини кийиб олганини кўриб, футболнинг қудратини англайсиз".
Ҳақорат ҳақида:
"Бу жуда ачинарли, чунки ҳали ҳам жуда ёмон қўшиқлар, жуда аҳмоқона қўшиқлар бор. Уларга жой йўқлиги аниқ. Футболчи майдонда, захира ўриндиғида бўлганида жиддий ҳақоратланиши мумкин, бундай бўлмаслиги керак.
Биз одамлар, катталар, ота-оналар сифатида яхшиланишимиз керак, чунки кўпинча ота-оналар ўз фарзандлари олдида жуда қўпол имо-ишоралар ва ҳақоратлар қилишади ва бола ота-онасининг қилганини такрорлаши аниқ. Мен барча ота-оналарни ва барча катталарни уларнинг сўзлари ва имо-ишораларига диққат билан қарашга чақираман - шундагина биз бу аҳмоқликка чек қўйишимиз мумкин.
Фарзандларингизни қандай тарбиялаётганингиз жуда муҳимдир. Сиз ўзингизга яхши ўрнак бўлишингиз, барчага, клуб ва стадион ходимларига ҳурмат билан муносабатда бўлишингиз, атрофингиздаги одамларга ғамхўрлик қилишингиз керак" - деди "Атлетико" форварди ФИФА матбуот хизматига берган интервьюсида.
