"Ювентус" бош мураббийи Игор Тудор клуб билан 2027 йилнинг июнигача мўлжалланган янги меҳнат шартномасини имзолади. Келишувда шартномани яна бир йилга узайтириш имконияти ҳам бор.
Бу ҳақда La Gazzetta dello Sport нашри хабар бермоқда. 47 ёшли мутахассис билан ҳамкорликни давом эттириш қарори жамоа ичида тўлиқ қўллаб-қувватланди. Қайд этилишича, Тудор тез орада футболчилар билан алоқа ўрнатди ва ўзини кучли етакчи сифатида кўрсатди, бу эса янги келишув бўйича музокараларда муҳим роль ўйнади.
Хорватиялик мураббий Турин жамоасини 2025 йилнинг март ойида қабул қилиб олганди. Унинг қўл остида "Ювентус" Италия чемпионатида тўққизта ўйин ўтказди: бешта ғалаба, учта дуранг ва битта мағлубият.
