"Лацио" бош мураббийи Маурицио Сарри Женнаро Гаттузонинг Италия терма жамоасига бош мураббий этиб тайинланганига муносабат билдирди.
Тажрибали мутахассиснинг фикрича, Италия клуб футболининг Европадаги рейтинги юқори бўлишига қарамай, терма жамоа чуқур муаммоларга дуч келмоқда.
"Италия клублари футболи савияси билан терма жамоанинг ўйини ўртасида яққол тафовут бор. Икки йил олдин УЕФА коэффициентлари жадвалида иккинчи ўринда эдик, ҳозир учинчи ўриндамиз, аммо терма жамоанинг натижалари барқарор эмас. Бу хавотирли сигнал", - деди Сарри Tuttomercatoweb билан суҳбатда.
Гаттузо ҳақида гапирар экан, Сарри терма жамоанинг янги мураббийининг асосий кучи унинг характери бўлиб қолишини таъкидлади: "Мен Гаттузони яхши кўраман ва унинг ёндашувини ҳурмат қиламан. Мен унга берадиган ягона маслаҳат - бу ўзи бўлиш. Муроса қилманг, услубингизни ўзгартирманг. Женнаро ҳар доим чин юракдан ўйнаган ва мураббийлик қилган - бу унинг йўли", дея қўшимча қилди Сарри.
Гаттузо июнь ойи бошида Италия терма жамоасини тарк этган Лучано Спалеттининг ўрнини эгаллади.
