"Lasio" bosh murabbiyi Maurisio Sarri Jennaro Gattuzoning Italiya terma jamoasiga bosh murabbiy etib tayinlanganiga munosabat bildirdi.
Tajribali mutaxassisning fikricha, Italiya klub futbolining Yevropadagi reytingi yuqori bo‘lishiga qaramay, terma jamoa chuqur muammolarga duch kelmoqda.
"Italiya klublari futboli saviyasi bilan terma jamoaning o‘yini o‘rtasida yaqqol tafovut bor. Ikki yil oldin UYEFA koeffisiyentlari jadvalida ikkinchi o‘rinda edik, hozir uchinchi o‘rindamiz, ammo terma jamoaning natijalari barqaror emas. Bu xavotirli signal", - dedi Sarri Tuttomercatoweb bilan suhbatda.
Gattuzo haqida gapirar ekan, Sarri terma jamoaning yangi murabbiyining asosiy kuchi uning xarakteri bo‘lib qolishini ta’kidladi: "Men Gattuzoni yaxshi ko‘raman va uning yondashuvini hurmat qilaman. Men unga beradigan yagona maslahat - bu o‘zi bo‘lish. Murosa qilmang, uslubingizni o‘zgartirmang. Jennaro har doim chin yurakdan o‘ynagan va murabbiylik qilgan - bu uning yo‘li", deya qo‘shimcha qildi Sarri.
Gattuzo iyun oyi boshida Italiya terma jamoasini tark etgan Luchano Spalettining o‘rnini egalladi.
