"Манчестер Сити" марказий ҳимоячиси Абдуқодир Ҳусанов узоқ вақтдан буён илк бор майдонга тушди.
21 ёшли футболчи клублар ўртасидаги жаҳон чемпионати гуруҳ босқичи 2-туридан ўрин олган "Ал-Айн"га қарши ўйинда "шаҳарликлар"нинг асосий таркибидан жой олди. Ўзбекистон вакили 61-дақиқагача ўйнади ва сариқ карточка олишга улгурди, шундан сўнг у Оскар Бобб билан алмаштирилди. Бу вақтда инглиз гранди 3:0 ҳисобида олдинда бораётган эди.
Шу кунгача Абдуқодир Ҳусанов "Манчестер Сити" сафида деярли уч ойдан буён ўйнамаётган эди. Марказий ҳимоячимизнинг аввалги ўйини 30 мартга тўғри келади - ўшанда Хосеп Гвардиола жамоаси Англия кубогида "Борнмут"ни мағлуб этганди (3:0).
