"Барселона" Френки де Йонг билан шартномани узайтиришга яқин турибди.

Журналист Жерар Ромеронинг маълум қилишича, каталонияликлар июнь ойи охирига қадар келишувни якунлашни режалаштирмоқда. Нидерландиялик футболчи ҳафта охиригача янги келишув имзолаши кутилмоқда.

Mundo Deportivo'нинг қайд этишича, де Йонг билан шартномани узайтириш "Барселона"га молиявий аҳволини яхшилаш имконини беради. Келишувнинг қайта тузилиши туфайли клуб келгуси мавсумда янги шартномалар учун кўпроқ имкониятларга эга бўлади.

Де Йонгнинг "Барселона" билан амалдаги шартномаси 2026 йилда ўз ниҳоясига етади. Ўтган мавсумда 28 ёшли ярим ҳимоячи Ла Лигада 26 та ўйинда 2 та гол ва 2 та голли узатмага муаллифлик қилди.