Аввалроқ Мадриднинг "Реал" клубида тўп тепган Гарет Бэйл 2024/25 йилги мавсум якунларига кўра Чемпионшипни тарк этган Уэльснинг "Кардифф Сити" клубини сотиб олиш нияти борлигини маълум қилди.
Собиқ футболчи жамоани сотиб олишдан манфаатдор бўлган америкалик хусусий инвесторлар консорциумига раҳбарлик қилмоқда.
"Биз ҳақиқатан ҳам бу битимдан манфаатдормиз. Бу менинг қадрдон клубим, мен шу шаҳарда ўсганман ва эгаларининг бир қисми бўлиш мен учун орзу бўларди. Клубда ажойиб мухлислар бор ва мен уни АПЛга қайтаришда ёрдам беришни хоҳлардим," - дея "Реал"нинг собиқ футболчисидан иқтибос келтиради Goal.
Унинг сўзларига кўра, айни пайтда инвесторлар гуруҳи клуб раҳбарияти билан дастлабки алоқаларни олиб бормоқда ва яқин келажакда битим бўйича кўпроқ аниқлик киритилиши кутилмоқда.
