Суперлига 13-тури доирасида 23 июн, душанба кунги «Динамо» - «Бунёдкор» (0:3) ўйинида Самарқанддаги «Динамо» стадиони лиқ тўлгач, 2 мингдан ортиқ томошабин ўйингоҳ ташқарисида қолди, улар орасида чиптаси бор ўнлаб мухлислар ҳам бор эди.

"Ўйингача «Динамо» стадиони мухлислар билан деярли тўлгач, асосий кириш дарвозаси олдида юзлаб мухлислар тўпланиб қолди. Соат 19:45 атрофида оломон ўйингоҳга кириш илинжида тартибсизлик чиқарди ва жуда кўп чиптасиз мухлислар ҳам стадионга кириб кетиш ҳолати кузатилди. Шунингдек, аксарият ишқибозларнинг панжаралар устидан ва турли йўллар билан стадионга кириб олиши ҳолатлари қайд этилди. Бунинг оқибатида чиптаси бор бўлган ва ўйин бошланиши арафасида стадионга келган ўнлаб мухлислар ҳам стадионга кира олишмади. Сабаби стадион мухлислар билан лиқ тўлгач, тартибни сақлаш ходимлари ёрдамида хавфсизлик нуқтаи назаридан ўйингоҳ дарвозалари тўлиқ ёпиб қўйилди. Танаффусда эса чиптаси бор аксарият мухлислар стадионга киритилди.

Шунга қарамай, аксарият мухлислар ижтимоий тармоқларда сотиб олинган чипта билан ҳам ўйинга кира олмаганликлари ҳақида мурожаатлар йўллашди. Ўша чипта билан 2 июль куни «Динамо» - «Нефтчи» учрашувига киришингиз мумкинлигини маълум қиламиз.

Шунингдек, «Динамо» ПФК чипталар сотуви билан клуб эмас, «Динамо» стадиони маъмурияти шуғулланишини маълум қилади", - дейилади клуб баёнотида.