Superliga 13-turi doirasida 23 iyun, dushanba kungi «Dinamo» - «Bunyodkor» (0:3) o‘yinida Samarqanddagi «Dinamo» stadioni liq to‘lgach, 2 mingdan ortiq tomoshabin o‘yingoh tashqarisida qoldi, ular orasida chiptasi bor o‘nlab muxlislar ham bor edi.

"O‘yingacha «Dinamo» stadioni muxlislar bilan deyarli to‘lgach, asosiy kirish darvozasi oldida yuzlab muxlislar to‘planib qoldi. Soat 19:45 atrofida olomon o‘yingohga kirish ilinjida tartibsizlik chiqardi va juda ko‘p chiptasiz muxlislar ham stadionga kirib ketish holati kuzatildi. Shuningdek, aksariyat ishqibozlarning panjaralar ustidan va turli yo‘llar bilan stadionga kirib olishi holatlari qayd etildi. Buning oqibatida chiptasi bor bo‘lgan va o‘yin boshlanishi arafasida stadionga kelgan o‘nlab muxlislar ham stadionga kira olishmadi. Sababi stadion muxlislar bilan liq to‘lgach, tartibni saqlash xodimlari yordamida xavfsizlik nuqtai nazaridan o‘yingoh darvozalari to‘liq yopib qo‘yildi. Tanaffusda esa chiptasi bor aksariyat muxlislar stadionga kiritildi.

Shunga qaramay, aksariyat muxlislar ijtimoiy tarmoqlarda sotib olingan chipta bilan ham o‘yinga kira olmaganliklari haqida murojaatlar yo‘llashdi. O‘sha chipta bilan 2 iyul kuni «Dinamo» - «Neftchi» uchrashuviga kirishingiz mumkinligini ma’lum qilamiz.

Shuningdek, «Dinamo» PFK chiptalar sotuvi bilan klub emas, «Dinamo» stadioni ma’muriyati shug‘ullanishini ma’lum qiladi", - deyiladi klub bayonotida.