Мадриднинг "Реал" клуби клублар ўртасидаги жаҳон чемпионати гуруҳ босқичи 3-туридан ўрин олган "Ред Булл Зальцбург"га қарши ўйин учун таркибни эълон қилди.
"Қаймоқранглилар"нинг ҳужум учлиги Винисиус Жуниор, Гонсало Гарсия ва Арда Гюлердан иборат бўлади, Родриго эса кетма-кет иккинчи ўйинда захирада ўйнайди. Ўтган турда "Пачука"га қарши ўйинда (3:1) бразилиялик футболчи захирадан ҳам майдонга тушмаган эди.
Хаби Алонсонинг Родригони майдонга туширишни истамаслиги футболчининг тез орада кетиши ҳақидаги миш-мишларни янада кучайтиради. Эслатиб ўтамиз, унга Лондоннинг "Арсенал" клуби қизиқиш билдирмоқда.
