Вьетнамда спорт курашлари бўйича ўсмирлар ва ёшлар ўртасида якунига етган Осиё чемпионатида мамлакатимиз спорт кураши вакиллари умумий ҳисобда 40 та медаллар шодасини қўлга киритди.

Қитъа чемпионатининг сўнгги кунида U-17 ёш тоифасида эркин кураш бўйича ўтказилган баҳсларда Ўзбекистон терма жамоаси аъзолари 2 та кумуш ва 3 та бронза медалига эгалик қилди.

-51 килограмм оғирликда Улуғбек Рашидов ва -55 килограммда гиламга чиққан Абдумалик Жалолиддинов кумуш, -45 килограмда Миржалол Мукаммилов, -48 килограммда Шаҳобиддин Нурманов ва -60 килограммда кураш олиб борган Фахриддин Насриддинов бронза медалларига мушарраф бўлди.

Икки кунлик беллашувлар сарҳисобига кўра, 1 та олтин, 3 та кумуш ва 5 та бронза медалларига сазовор бўлган U-17 ёш тоифасидаги эркин курашчиларимиз умумжамоада 3-ўринни банд этди.

Ушбу ёш тоифасидаги спортчиларимиз юнон-рум, эркин ва аёллар курашида 5 та олтин, 7 та кумуш ва 12 та бронза медалларини қўлга киритди.