Миланнинг "Интер" клуби ярим ҳимоячи Хакан Чалханўғлига ўринбосар қидирмоқда. Туркиялик футболчи катта эҳтимол билан ёзда сотилади - уни "Галатасарой" ўз сафига қўшиб олмоқчи. Яқинда "нерадзуррилар" президенти Жузеппе Маротта хавбек "Интер"да ўйнашни истамагани учун уни бошқа клубга қўйиб юборишга тайёрлигини айтганди.

Чалханўғлининг ўрнига номзодлар шорт-листида "Аталанта"дан Эдерсон, "Лацио"дан Николо Ровелла ва Лиссабоннинг "Спортинг" клубидан Мортен Юльманн бор, дея хабар беради инсайдер Николо Скира. Бразилиялик ва данияликнинг Transfermarkt порталидаги нархи 50 млн еврога, италияликнинг нархи эса 30 млн еврога баҳоланмоқда.