"Ливерпуль" ва Шотландия терма жамоаси ҳимоячиси Эндрю Робертсон Португалия терма жамоаси ва мерсисайдликлар ҳужумчиси Диогу Жота ҳамда унинг укаси, "Пенафиэл" футболчиси Андре Силванинг Испаниядаги ЙТҲ оқибатида ҳалок бўлгани ҳақидаги хабарга муносабат билдирди.
"Ҳозир кўпроқ Диогу оиласи ҳақида ўйлаяпман. Улар учун бу айниқса ўрнини тўлдириб бўлмайдиган йўқотишдир. Улар шундай икки ёрқин инсон - Диогу ва Андредан айрилганига жуда ачинаман. Жамоа ва клуб учун қанча вақт кетса ҳам, буни енгишга ҳаракат қиламиз.
Мен дўстим ҳақида бир нарса айтмоқчиман. Мен жуда қадрлаган ва соғинадиган йигит ҳақида. Мен у ҳақида ўйинчи сифатида соатлаб гапиришим мумкин эди, лекин ҳозир бу нимани англатишини ҳис қилмаяпман. У жуда яхши йигит эди. Энг яхшиси. Яқинларига бўлган муҳаббатга тўла. Қувноқликка тўла," - деб ёзди Робертсон ижтимоий тармоқда.
