Ярим ҳимоячи Ренату Саншеш "ПСЖ"га қайтди. "Бенфика" клуби ўзининг расмий сайтида 27 ёшли футболчининг ижара муддати якунлангани ҳақида эълон жойлаштирди. "Бургутлар" Саншешни ўтган йилнинг августида ижарага олганди. 2024/2025 йилги мавсумда Ренату 21 та ўйинда майдонга тушиб, битта гол урган.
Ўз вақтида Саншешни Европанинг энг истеъдодли футболчиларидан бири деб аташган. Бироқ, ярим ҳимоячининг фаолияти 2016 йилнинг ёзида "Бавария"га ўтганидан кейин пасайиб кетди. Дарвоқе, Саншеш Евро-2016нинг энг яхши ёш футболчиси деб топилганди.
Ренату Саншешнинг "ПСЖ" билан амалдаги шартномаси 2027 йилнинг ярмигача мўлжалланган.
