Мадриднинг "Атлетико" клуби ярим ҳимоячиси Родриго Де Пауль Бразилиянинг "Фламенго" клуби қизиқишлар доирасига кириб қолди. Бу ҳақда журналист Хулио Мигель Нето ўз ижтимоий тармоқларида маълум қилди.
Манбага кўра, клуб аллақачон мадридликлар билан музокаралар олиб бормоқда ва ушбу трансфер учун 15 миллион евро тўлаши мумкин. Аргентиналик футболчини қўлга киритишга унинг терма жамоадаги шериги Лионель Месси тўп тепаётган "Интер Майами" ҳам жиддий бел боғлаган.
Де Поль 2021 йилдан бери "Атлетико" шарафини ҳимоя қилмоқда. У ўтган мавсумда 53 та ўйинда майдонга тушиб, 3 та гол урди ва 10 та голли узатмани амалга оширди. 31 ёшли ярим ҳимоячи амалдаги жаҳон чемпиони ҳисобланади.
