"Бавария"нинг ҳужумкор ярим ҳимоячиси Жамал Мусиала клублар ўртасидаги жаҳон чемпионатида "ПСЖ"га қарши кечган ўйинда жиддий жароҳат олди. Мусиала жарроҳлик амалиётини бошдан кечирди ва энди узоқ вақтни ўтказиб юборади.
Чоршанба куни Мусиала ижтимоий тармоқларда видео жойлаштирди. "Бавария" футболчиси барчага қўллаб-қувватлов сўзлари учун миннатдорчилик билдирди ва операциядан кейин ўзини яхши ҳис қилаётганини таъкидлади. Мусиала "ПСЖ" дарвозабони Жанлуижи Доннарумма айбдор эмаслигини билдирди. Айнан италиялик билан тўқнашувдан сўнг Жамол жароҳат олганди.
"Ҳеч ким айбдор эмас. Бундай ҳолатлар бўлиб туради," - деди Мусиала.
"Бавария" янги мавсумнинг илк расмий ўйинини 16 август куни Германия Суперкубоги доирасида "Штутгарт"га қарши ўтказади.
