Мадриднинг "Реал" клуби ярим ҳимоячиси Федерико Вальверде жамоа клублар ўртасидаги жаҳон чемпионатидан чиқиб кетганидан сўнг баёнот берди.
Хаби Алонсо жамоаси ярим финалда "ПСЖ"га йирик ҳисобда ютқазди - 0:4. Шу билан "қаймоқранглилар" учун омадсиз 2024/25 йилги мавсум якунланди.
"Биз ҳар куни ишладик, турнирга тайёргарлик кўрдик. Биз буни уддалай олмадик, аммо ҳар томонлама ўсиш учун жамоа бўлиб курашишда ва ишлашда давом этамиз. Биз мухлислар учун, шунингдек, майдонда ва унинг ташқарисида ҳаммамизга доим ўрнак бўлган Лука Модрич ва Лукас Васкес учун КЎЖЧда ғалаба қозонишни жуда хоҳлагандик. Раҳмат сизларга, дўстлар, ҳиссангиз ва шунча йиллар учун. Бизни қайғуда ҳам, қувончда ҳам қўллаб-қувватлаган сиз, "Реал" мухлисларига алоҳида раҳмат. Hala Madrid! - деди Вальверде.
Эслатиб ўтамиз, Модрич ва Васкес учун "ПСЖ"га қарши ўйин "Реал"даги сўнггиси бўлди.
