"Барселона" бош мураббийи Ханс-Дитер Флик ва клуб президенти Жоан Лапорта "Манчестер Юнайтед" вингери Маркус Рэшфорднинг агенти Пини Захави билан учрашув ўтказди.
Учрашув Барселонада бўлиб ўтди, унда инглизнинг "кўк-анорранглилар" сафига ўтиши мумкинлиги муҳокама қилинди, деб хабар беради журналист Хосе Альварес. Бундан ташқари, Захавининг мижози бўлган ярим ҳимоячи Френки де Йонгнинг ҳам шартномасини узайтириш ҳақида гап борган.
Миш-мишларга кўра, Маркус Рэшфорд "Барселона"га ўтмоқчи, "Манчестер Юнайтед" эса унинг трансфери учун тахминан 40 млн евро сўрамоқда. Ўтган мавсумнинг иккинчи қисмида 27 ёшли футболчи ижара асосида "Астон Вилла" шарафини ҳимоя қилган эди.
