Брайан Мбемонинг "Манчестер Юнайтед"га трансфери борасидаги музокаралар боши берк кўчага кириб қолди.

Аввалроқ, "Брентфорд" "манкунианликлар"нинг 62,5 миллион фунт стерлинг миқдоридаги иккинчи таклифини рад этгани, чунки улар 65 миллионни олмоқчи бўлгани хабар қилинганди.

Энди "Брентфорд" бу суммани деярли 70 миллион фунтга оширди, бироқ "Манчестер Юнайтед" вингер учун 65 миллиондан ортиқ тўламоқчи эмас, деб ёзади The Guardian.

Позициянинг ўзгариши "МЮ" хўжайини Жим Рэтклифф ва спорт директори Жейсон Уилкокснинг қаршиликларига дуч келди, улар энди келишувни шошилтирмоқчи эмаслар. "Брентфорд" ўз позициясини мустаҳкам деб ҳисоблайди, чунки футболчининг шартномаси келаси ёзда тугайди, аммо клубда уни бир йилга узайтириш имконияти бор.

Энди, агар "Манчестер Юнайтед" ўз таклифини оширишга қарор қилса, улар биринчи навбатда Маркус Рэшфорд, Алехандро Гарначо, Антони, Жейдон Санчо ёки Тирелл Маласиани сотиши ёки ижарага беришлари керак. "Манчестер Юнайтед"нинг айтишича, уларнинг ҳаммаси жамоадан кетишни сўрашган, шунинг учун улар барча таклифларни кўриб чиқишади.