"Sport24" нашри хабарига кўра, Германия терма жамоасининг собиқ устози Йоахим Лёв ҳақиқатдан ҳам Ўзбекистон футбол ассоциацияси билан музокаралар олиб бормоқда. Бироқ, бу босқичда бош мураббий лавозими эмас, балки маслаҳатчининг роли муҳокама қилинмоқда.

"Томонлар ўртасида алоқа бор - Лёв ҳамкорликка очиқ. Лекин уни бош мураббий этиб тайинлаш ҳақида ҳозирча гап йўқ. Ўзбекистон унга терма жамоанинг жаҳон чемпионатига тайёргарлигини назорат қилувчи маслаҳатчи ролини таклиф қилди", - дейди мутахассисга яқин манба.

"ЎФАда ягона позиция йўқ. Айрим мутасаддилар жамоага жаҳон чемпионати учун таниқли мутахассис керак, деб ҳисоблаб, Лёвни бош мураббийликка таклиф қилишда туриб олишмоқда. Аммо федерациянинг яна бир қисми Тимур Кападзени олиб қолиш тарафдори - у терма жамоани жаҳон чемпионатига олиб чиққан эди. Кападзенинг ўзи ҳам ёрдамчи бўлишни истамаяпти", дея қўшимча қилди манба.

Манбага кўра, томонлар ўртасида маслаҳатлашувлар давом этмоқда - Лёвнинг Ўзбекистон терма жамоаси таркибидаги роли формати муҳокама қилинмоқда.