"Sport24" nashri xabariga ko‘ra, Germaniya terma jamoasining sobiq ustozi Yoaxim Lyov haqiqatdan ham O‘zbekiston futbol assosiasiyasi bilan muzokaralar olib bormoqda. Biroq, bu bosqichda bosh murabbiy lavozimi emas, balki maslahatchining roli muhokama qilinmoqda.
"Tomonlar o‘rtasida aloqa bor - Lyov hamkorlikka ochiq. Lekin uni bosh murabbiy etib tayinlash haqida hozircha gap yo‘q. O‘zbekiston unga terma jamoaning jahon chempionatiga tayyorgarligini nazorat qiluvchi maslahatchi rolini taklif qildi", - deydi mutaxassisga yaqin manba.
"O‘FAda yagona pozisiya yo‘q. Ayrim mutasaddilar jamoaga jahon chempionati uchun taniqli mutaxassis kerak, deb hisoblab, Lyovni bosh murabbiylikka taklif qilishda turib olishmoqda. Ammo federasiyaning yana bir qismi Timur Kapadzeni olib qolish tarafdori - u terma jamoani jahon chempionatiga olib chiqqan edi. Kapadzening o‘zi ham yordamchi bo‘lishni istamayapti", deya qo‘shimcha qildi manba.
Manbaga ko‘ra, tomonlar o‘rtasida maslahatlashuvlar davom etmoqda - Lyovning O‘zbekiston terma jamoasi tarkibidagi roli formati muhokama qilinmoqda.
