"Гремио Деспортиво Пруденте" жамоаси футболчиси Келси кеча бўлиб ўтган Паулиста кубоги ўйинида гол урди. 30 ёшли Келси 11 метрлик жарима зарбасидан дастлаб фойдалана олмади, бироқ дарвозабондан қайтган тўпга дарҳол қайта зарба беришга муваффақ бўлди.
Голдан сўнг ҳис-ҳаяжонга берилиб кетган Келси уни Криштиану Роналду услубида нишонлашга қарор қилди. Аммо бу яхшилик билан якунланмади - тажрибали футболчи сакрагандан кейин ерга ноқулай тушди. Келсининг тиззаси жиддий шикастланган бўлиши мумкин деган тахмин бор.
Эслатиб ўтамиз, яқинда машҳур футболчи Криштиану Роналду "Ан-Наср" жамоаси билан шартномани кейинги икки мавсумга узайтирган эди.
