Абдуқодир Ҳусанов июнь ойидаги ФИФА кунлари доирасида Тошкентга келганида мухлисларга имзо тарқатда, улар билан суратга тушди. Аммо у “Реал Мадрид” футболкасига имзо чекиб беришни сўраган мухлиснинг илтимосини рад этди. Ҳусановнинг бу ҳаракати ижтимоий тармоқларда “Манчестер Сити” мухлисларининг олқишларига сазовор бўлди.

21 ёшли футболчи Англиядаги порлоқ дебютидан сўнг “Сити” ишқибозлари орасида жуда машҳур бўлиб улгурди. У 2024 йил январь ойида “Челси”га қарши ўйинда майдонга тушиб, Премьер-лигада тўп сурган илк ўзбекистонлик футболчига айланганди.

“Манчестер Сити” Ҳусановни январь ойидаги трансфер ойнаси ёпилиши арафасида Франциянинг “Ланс” жамоасидан бонуслар билан бирга 33.6 миллион эвазига харид қилган эди. Ёш марказий ҳимоячи аллақачон “Реал Мадрид”, “Ливерпуль” ва “Тоттенхэм” каби жамоаларга қарши асосий таркибда майдонга тушган.

Ҳусановнинг оқ рангли “Реал” футболкасига имзо қўйишдан бош тортгани “Сити” мухлислари томонидан юракдан қўллаб-қувватланди ва у яна бир бор уларнинг “қаҳрамони” сифатида намоён бўлди.