"Лион" "Ноттингем Форест" дарвозабони ва АҚШ терма жамоаси посбони Мэтт Тернер трансфери бўйича аввал келишилган келишувни бекор қилмоқчи, деб ёзади L’Equipe.
Томонлар аллақачон саккиз миллион евролик трансфер бўйича келишувга эришган, бироқ кўп ўтмай "Лион" молиявий ҳисоботларни бузиш билан боғлиқ можаро марказида қолди. Клуб Лига 2га тушиб кетиш хавфи остида эди, аммо якунда у элитадаги ўрнини сақлаб қолди. Ушбу воқеалар фонида америкалик тадбиркор Жон Текстор жамоа раҳбариятидаги лавозимини тарк этди.
"Лион" Лига 1да қолганига қарамай, маош ва харажатлар бўйича чекловлар туфайли клубга трансфер бозорида эркин ҳаракат қилиш тақиқланган. Шу муносабат билан клуб раҳбарияти "Ноттингем Форест" билан Тёрнер бўйича келишувни бекор қилиш масаласини муҳокама қилиш учун адвокат ёллади.
