Миланнинг "Интер" клуби хавбеки Давиде Фраттези клуб билан янги шартнома имзолайди.
Томонлар 2030 йил ўрталарига қадар мўлжалланган келишув шартлари бўйича деярли келишиб олдилар, дея хабар беради инсайдер Николо Скира ўз ҳисоботида. 25 ёшли футболчининг маоши йилига 3,4 млн еврони ташкил этади.
Давиде Фраттезининг "Интер" билан амалдаги шартномаси 2028 йилда ўз ниҳоясига етади. Ўтган мавсум давомида матбуотда ярим ҳимоячи уни асосий таркибда кўрмаган Симоне Индзаги туфайли "нерадзуррилар" сафини тарк этмоқчи экани ҳақида хабарлар тарқалди. Июнь ойи бошида жамоани Кристиан Киву қабул қилиб олди, у италиялик футболчига ишонишга тайёр, шунинг учун у кетиш фикридан қайтди.
