"Галатасарой" ҳужумчи Виктор Осимхенни "Наполи"дан сотиб олганини эълон қилди. Турк гранди 26 ёшли нигериялик футболчини расман ўз сафига қўшиб олди, битим қиймати клуб учун рекорд даражадаги 75 млн еврони ташкил этди. Журналист Николо Скиранинг ёзишича, футболчи "Галатасарой"да йилига 18 млн евро маош олади. Манбанинг қайд этишича, "Наполи" форварднинг келгусидаги қайта сотуви суммасининг 10 фоизини ҳам қўлга киритади.
Виктор Осимхен ўтган мавсумда истанбулликлар сафида ижара асосида тўп тепган эди. У "Наполи"га 2020 йилда Франциянинг "Лилль" клубидан кўчиб ўтган.
"Галатасарой" ўтган мавсум якунларига кўра Туркия чемпиони бўлди, шунингдек, мамлакат кубогини қўлга киритди. Осимхен жамоа сафида 41 та ўйинда 37 та гол урган.
