"Интер Майами" ҳужумчиси Лионель Месси жамоага янги келиб қўшилган Родриго де Паул ҳақидаги саволга жавоб берди.

"Қўтонлар" 31 ёшли ярим ҳимоячини Мадриднинг "Атлетико" клубидан сотиб олиш шарти билан ижарага олди. Бугун янги футболчи "Интер Майами" сафида дебют қилди: у асосий таркибда майдонга тушди ва Лигалар кубоги баҳсида Мексиканинг "Атлас" клубини мағлуб этишга ёрдам берди (2:1).

"Де Паулнинг трансфери - бу ажойиб. Биз узоқ вақтдан бери танишмиз, терма жамоа сафида кўп ўйинларни бирга ўтказдик. У жамоага кўп фойда келтиради. Родриго ниҳоятда ғайрат-шижоат билан келди. У ҳатто биз билан машғулот ҳам ўтказмади, аммо тўлиқ ўйин ўтказа олди, бу унинг ақл бовар қилмас даражасидан далолат беради," - дейди интервьюда 38 ёшли форвард.

Месси "Атлас" билан ўйинда иккита голли узатмани амалга оширди.