"Барселона" Ориол Ромеу билан шартномани бекор қилиш бўйича музокаралар олиб бормоқда.
Аввалроқ, 33 ёшли ҳимоячи каталонияликлар билан Осиё турнесига бормаган эди. Футболчи Ҳанси Фликнинг кейинги мавсумдаги режаларига киритилмаган.
Ромеу 2023 йилда "Жирона"дан "Барса"га ўтганди. У ўтган мавсумда "Жирона"да ижара асосида ўйнади.
Diario Sport хабарига кўра, клублар ҳимоячининг келажаги борасида мулоқотни давом эттирмоқда. Испаниялик футболчининг "блауграна" билан амалдаги келишуви 2026 йилнинг 30 июнига қадар мўлжалланган.
Таъкидланишича, "Барселона" Ориол билан шартномани бекор қилиши ва унга бир йиллик шартнома бўйича қолган маошининг ярмини тўлаши мумкин.
Футболчига "Жирона"дан ташқари "Реал Овьедо" ҳам қизиқиш билдирмоқда, аммо унинг ўзи майдонда ва кийиниш хонасида қадрланадиган жамоага қайтишни афзал кўрмоқда.
