«Ливерпуль» ҳужумчиси Муҳаммад Салоҳ УЕФАнинг Фаластин терма жамоасининг собиқ футболчиси Сулаймон ал-Убайд вафоти ҳақидаги хабарига муносабат билдирди.

Эслатиб ўтамиз, УЕФАнинг Х ижтимоий тармоғида 41 ёшли собиқ футболчи вафоти ҳақида хабар берилган эди.

«Хайр, Сулаймон ал-Убайд — “фаластинлик Пеле”. Ҳатто энг қийин дамларда ҳам минглаб болаларга умид бағишлаган истеъдод», — дейилган эди УЕФА хабарида.

Мисрлик футболчи ушбу хабарни қайта тарқатиб, УЕФАдан ал-Убайднинг ўлими сабаблари ва жойи ҳақида маълумот беришини сўради. «У қандай қилиб ҳалок бўлди, қаерда ва нима учун? Айта оласизми?» — деб ёзди Салоҳ ўзининг Х саҳифасида.

Маълумот учун, 2025 йил 6 август куни Фаластин футбол ассоциацияси Сулаймон ал-Убайд Ғазонинг жанубий қисмида инсонпарварлик ёрдамини кутиб турган пайтда Исроилнинг ўқ узиши натижасида ҳалок бўлганини маълум қилди.

У ўз фаолияти давомида «Аш-Шати», «Маркез Шабаб ал-Амарий» ва «Ғаза Спорт» клубларида ўйнаб, 100 дан ортиқ гол урган.