«Галатасарой» матбуот хизмати испаниялик ҳужумчи Альваро Мората билан шартнома бекор қилинганини маълум қилди. Футболчининг трансфер ҳуқуқлари «Милан» клубига тегишли эди.
«Раҳмат, Мората, “Галатасарой”га бўлган садоқатинг учун! Кейинги фаолиятингда омад тилаймиз!», — деб ёзди «шерлар» матбуот хизмати.
Маълум қилинишича, томонлар ўзаро келишувга кўра шартномани бекор қилди. Шу муносабат билан «Милан» турк клубига 5 млн компенсация тўлайди. Аввалроқ ОАВда Мората Италиянинг «Комо» клубига ўтиши мумкинлиги ва бу ҳақда бир ойча аввал келишувга эришилгани хабар қилинган эди.
2025 йил февралидан бери 32 ёшли испаниялик футболчи «Галатасарой» сафида «Милан»дан ижара асосида ўйнаб келар эди. Ижара муддати 2026 йил январь ойига қадар давом этиши керак эди. Туркия клуби сафида Мората 16 та ўйинда майдонга тушиб, 7 та гол урди ва 3 та голли узатма берди.













