Лондоннинг "Арсенал" клуби ҳужумчиси Виктор Дьёкереш Англия чемпионатининг 2-туридан ўрин олган "Лидс"га қарши баҳсда дубль қайд этди.
"Канонирлар" ўз уйида 5:0 ҳисобида ғалаба қозонган бўлса, швециялик футболчи 48 ва 95-дақиқаларда гол уриб, жамоанинг учинчи ва бешинчи голларига муаллифлик қилди. Squawka хабарига кўра, Дьёкереш Габриэл Жезусдан кейин Премьер-лигадаги дебют уй учрашувида икки ёки ундан ортиқ гол урган "Арсенал"нинг иккинчи футболчисидир. Бразилиялик бу ишни 2022 йилнинг августида "Лестер"га қарши баҳсда амалга оширганди.
Виктор Дьёкереш июль ойида "Арсенал" томонидан Лиссабоннинг "Спортинг" клубидан сотиб олинган эди. 27 ёшли форвард Лондон клуби билан 2030 йилгача мўлжалланган шартномага имзо чекди.
